Entre o 6 de xaneiro e o 5 de febreiro estará aberto o prazo para solicitar as axudas para o fomento da silvicultura en bosques no medio rural.
Poderán ser beneficiarios destas axudas, os propietarios particulares, as agrupacións dos ditos propietarios, as cooperativas agrarias, os proindivisos, as comunidades de bens, as entidades locais, outras persoas con personalidade xurídica e as comunidades de montes veciñais en man común.
Non poderán ser beneficiarias as persoas físicas ou xurídicas que non sexan propietarias dos terreos obxecto de axuda. Non se admite a cesión por parte do propietario do terreo a un terceiro.
Os importes de subvención corresponderanse, como máximo, co 60% do valor máximo de investimento no caso de traballos silvícolas en zonas desfavorecidas e co 50% do valor máximo de investimento no resto dos casos.
Actuacións obxecto de axuda
-
Rareos en masas de coníferas con diámetro normal medio da masa inferior a 12 cm.
-
Rozas previas ás podas, e podas en masas de coníferas.
-
Tratamentos silvícolas en masas de frondosas caducifolias, sobreiras e aciñeiras con diámetro normal medio da masa comprendido entre os 10 e os 20 cm. (Consideraranse como tales aquelas cun mínimo dun 80% de superficie ocupada por frondosas caducifolias, sobreiras e aciñeiras e cunha densidade mínima destas de 400 pés/ha).
-
Rexeneración e/ou mellora de soutos de castiñeiros cunha densidade mínima de 100 pés/ha.
-
Tratamentos silvícolas en masas de eucalipto co obxectivo de obter madeira de calidade para serra ou chapa, en quenda de 25-30 anos.
|
| Axudas para a restauración dos montes afectados polo temporal Klaus
|
Entre o 9 de xaneiro e o 8 de febreiro estará aberto o prazo para solicitar as axudas para a restauración dos montes afectados polo temporal Klaus durante o ano 2009.
Poderán beneficiarse destas axudas os propietarios privados, comunidades de montes e concellos con montes, así como as asociacións de propietarios e de comunidades de montes e mancomunidades de concellos, que sexan propietarios de terreos situados nos concellos que se relacionan no anexo I da Orde e posúan montes danados polo temporal Klaus e para os que se solicitara subvención para a saca e corta da madeira afectada ou se notificara o dano á Xunta de Galicia, por calquera medio que deixe constancia administrativa.
Os importes da subvención corresponderanse como máximo co 70% do valor máximo do investimento.
Actuacións obxecto de axuda
-
Restauración de masas de coníferas con plantación de coníferas ou frondosas excepto eucaliptos.
-
Restauración de masas de eucalipto con plantación de coníferas ou de frondosas e para selección de abrochos de eucalipto e extracción ou eliminación dos restos ata acadar unha densidade final mínima de 600 abrochos por hectárea e máxima de 816 abrochos por hectárea, homoxeneamente distribuídos e mellor conformados, deixando só un abrocho por cepa.
Estas actuacións non poderán solicitarse sobre unha mesma superficie.
|
| |
